Në këtë postim të Kinofigurimit te BLLOGU, po e ndajmë versionin e skenuar të një teksti interesant arkivor, të botuar në revistën Përparimi. Artikulli u shkrua nga Zhivomir Simoviq, një kritik filmi që kontribuonte shpesh në Përparimi dhe u botua në 1957. Këtu, autori i analizon problemet e ‘kinofikimit në Kosovë’ dhe repertorët e kinemave ekzistuese. Sidomos në vitet 1950, hasim në shumë raporte dhe diskutime mbi themelimin e kinemave të reja në vend në marrëdhënie me ndikimin e tyre në arsimimin e njerëzve. Mbi konceptin e ‘kinofikimit’ mund të lexoni më shumë në artikullin hyrës të Kinofigurimit te BLLOGU. Vetëm tre vite para botimit të këtij teksti, i njëjti autor kishte botuar edhe një artikull të shkurtër të quajtur “Dinari – Momenti pothuajse vendimtar në politikën e repertorit të Kinemasë Bistrica”, në gazetën Rilindja në të cilin ai kritikon menaxhimin e orientuar drejt fitimit të Kino Bistrica. Argumentet e këtij artikulli janë analizuar në librin e ardhshëm mbi historinë e Kino Bistricës që është duke u përgatitur përbrenda programit hulumtues të Lumbardhit, ‘Kinofigurimi’.
