Për të shënuar këtë rast, Fjolla Hoxha nga Fondacioni Lumbardhi dhe Malibu (Barbara Braccini) biseduan para ngjarjes.

—

FH: Mënjanë interpretimet artistike, me fjalët tuaja, kush është Malibu?

M: Fjalë për fjalë, Malibu jam *unë*, Barbara. Pavarësisht nga emri që mund të tingëllojë ironik e që e kam zgjedhur pa asnjë arsye të thellë, muzika të cilën e shkruaj nën këtë pseudonim më përfaqëson 100%, është si një ditar. Të gjitha historitë që tregoj bartin dhimbjet e mia dhe nostalgjinë.

FH: Performancat tuaja përshkruhen si përvoja tingullore zhytëse, të ngjashme me ndjesinë e detit. Nga vjen marrëdhënia juaj me oqeanin dhe si ndikon kjo në punën tuaj?

M: Unë jam rritur pranë oqeanit, babai im është oqeanolog, ndërsa duke u rritur, dadoja ime kishte kishte obsesionim me delfinët….ndoshta të gjitha këto gjëra shfaqen në mënyrë të pavetëdijshme kur bëj muzikë, nuk jam saktësisht e sigurtë. Unë i stërmendoj gjërat, deri në atë pikë sa të sëmurem, kështu që ndoshta më duhet zhurma organike dhe qetësia e valëve për ta balancuar këtë. Koka ime është e zbrazët kur jam në oqean, gjë që ndoshta përfaqëson ndjesinë e lumturisë.

FH: Si do ta përshkruanit zonën ku takohen dhe ndërveprojnë përvoja muzikore dhe ajo kinematike në performancat tuaja?

M: Nëse themi se pjesa «kinematike» në thelb është aspekti vizual i performancave të mija muzikore, mendoj se ato duhet të ekzistojnë së bashku; njëri mbështetë tjetrin dhe anasjelltas. Muzika mund të jetë intenzive dhe e plotë, dhe shumë vizuale, ajo i fton dëgjuesit të kalojnë disi në një vet ekzaminim, kështu që është e rëndësishme që ajo që ata *shikojnë* ta mbështesë atë që mund ta ndjejnë. Një yll vezullues, një varkë në det të hapur, çkado që të jetë, me shpresë që t’i japë dëgjuesit qetësi dhe kuptim.

FH: A mund të flisni pak për hyrjen tuaj në botën e muzikës dhe çfarë drejtimi po merr rrugëtimi juaj aktualisht?

M: Para disa vitesh, përmes një miku zbarkova nga pasioni, dhe mendoj se gradualisht kjo hapsirë, në thelb u bë jeta ime. Pa e menduar aq shumë, mori drejtimin që mori ndërsa sot, nuk më intereson të bëj këtë apo atë «lëvizje» që të arrij çfarëdo tjetër. Jam e lumtur të shoh se ku shkon rrugëtimi dhe ndoshta dua edhe të befasohem! Emisioni im radiofonik në NTS është i vazhdueshëm, njëfar mënyre “më çon përpara” çdo muaj, kështu që do të shohim se ku shkon edhe kjo rrugë!

FH: A ekziston ndonjë temë apo urgjencë në zhvillim e sipër që dëshironi të trajtoni me punën tuaj në të ardhmen e afërt?

M: Nuk besoj, asgjë e veçantë që më vjen ndërmend. Ndoshta të qenit zemërthyer është ajo që do të më shtyej të vazhdoj të shkruaj muzikë. Zemra duhet të jetë ose bosh ose aq e mbushur, saqë mund të shpërthejë, në mënyrë që unë të kem diçka për të thënë.

Kjo përvojë e mbushur me një atmosferë të veçantë do të paraprihet nga një shfaqje speciale dhe do të pasohet nga një seancë përmbyllëse.

Për të ndjekur ngjarjen, ju lutemi përcillni vegëzën këtu dhe na ndiqni në instagram.

Ngjarje fillon prej orës 20:00 dhe hyrja ofrohet falas.

Ngjarja organizohet me mbështetjen e Raiffeisen Bank në Kosovë dhe Ambasadës Franceze në Kosovë.

Iniciativa që doli si përgjigje ndaj tentativës për ta privatizuar dhe rrënuar Kino Lumbardhin dëshmoi që angazhimi qytetar ndalon procese shkatërruese dhe inicon procese konstruktive kolektive që krijojnë hapësira, institucione dhe ide të përbashkëta. Fondacioni Lumbardhi është trashëgimi dhe produkt direkt i kësaj iniciative. I themeluar për t’i ndjekur kërkesat dhe qëllimet fillestare të saj, ai i ka vendosur në dialog hisedarët dhe komunitetet për ta rindërtuar një institucion që i përgjigjet kontekstit të vet dhe kohërave tona. 

Kur si themelues të organizatës, i morëm çelësat dhe e hapëm kinemanë në vitin 2015, nuk do të mund ta imagjinonim situatën që e kemi sot: Jo që do të ndryshonin katër qeveri dhe që do të duhej një vendim i Gjykatës Kushtetuese para se Kino Lumbardhi të bëhej pronë publike. As që rijetësimi i plotë i ndërtesës do të fillonte tek në vitin 2022. Mirëpo, arritëm deri këtu duke ndërtuar marrëdhënie të sinqerta me bashkëpunëtorë, organizata, përdorues të hapësirës dhe përkrahës të përkushtuar. Ata iu përgjegjën domosdoshmërisë së angazhimit afatgjatë për arritjen e misionit themelues të Lumbardhit. 

Duke e trajtuar procesin si një kërkim të hapur dhe përvojë të të mësuarit, ne u njoftuam me situatën, diskrepancat si dhe mundësitë e gjendjes në zhvillim e sipër të qeverisjes dhe infrastrukturës kulturore në Kosovë. Duke marrë pjesë në debatet vendore e ndërkombëtare për institucionet kulturore, kemi vënë në pyetje rolin e tyre të mundshëm në një proces të vazhdueshëm të shtet-ndërtimit dhe ndryshimeve shoqërore të përshpejtuara.  

Sfidat dhe gjendja e solidarizimit të nxitura nga COVID-19 na bënë edhe më të vetëdijshëm për rëndësinë e artistëve, punëtorëve kulturorë dhe institucioneve në ballafaqimin me paqartësitë e këtyre kohërave si dhe nevojën për të punuar së bashku rreth formësimit të një të ardhmeje të drejtë, të qëndrueshme dhe të jetueshme. Në këto rrethana të kufizimeve të shkaktuara nga masat si dhe renovimi në ardhje, Lumbardhi ka nisë zhvendosjen e fokusit nga hapësira për ta rishikuar vizionin e tij. 

Me kërkimet, programet dhe publikimet në njërën anë, e proceset kolektive të avokimit dhe instituimit në anën tjetër, Lumbardhi synon t’i zbusë kufijtë mes artit, teorisë dhe praktikës, duke kërkuar mjete të reja për t’i kuptuar këto kohëra dhe duke testuar parametra të ri për zhvillim në rrethin e vet dhe ekosistemin e gjerë qytetar. Kjo hapje është një mënyrë e re e të bashkuarit, hapje ndaj thellimit të marrëdhënieve me individë dhe institucione, ndarjes së njohurive, përvojave dhe burimeve, si dhe krijim i hapësirave të reja për zhvillim të këtyre bisedave. 

Në hapin e parë të kësaj faze, po e lansojmë platformën BLLOGU, të menduar nga ekipi i kërkimit dhe programit të Lumbardhit për t’i bërë të qasshme pjesët e kërkimeve dhe programeve për publikun dhe për t’i hapur ato për diskutim. Inicuar si platformë eksperimentale, BLLOGU do të ftojë artistë, hulumtues e lexues që të angazhohen me temat aktuale dhe të ardhshme kërkimore si dhe me programet e Lumbardhit. Filluar me artikuj javorë nga projektet kërkimore “Kinofigurimi” dhe “Formimi i Kombit” si dhe tinguj nga “Ditari i Dëgjimit”, program që e hijeshoi Kino Bahçen në verën pandemike, BLLOGU do të zgjerohet dhe formësohet me reagimin e kontribuesve dhe të publikut.